Aproximación

     Tras o trago amargo do Manaslu, encamiñámonos cara ó leste, onde nos agardaba o Kangchejunga, a "deusa dos cinco tesouros".

     Viaxamos en autobús ata Gopetar, lugar no que contratamos ós carrexadores. Comezamos con eles a aproximación a Sinam. De aí a Kebang -onde, como ocurriu na aproximación ó Manaslu, non había lodges- e, finalmente, a Yampuding. Aquí, os carrexadores decidiron marchar e vímonos na obriga de contratar a outros.

Ó fondo, cumio central do Kangchenjunga visto desde o campo I   Interior da tenda no campo base avanzado.

En liña de puntos a ruta de aproximación seguida para chegar ó campo base do Kangchenjunga.

     De Yampuding viaxamos a Angi Khola (2300 m), logo a Torontan (2950 m) -por un camiño de vexetación mesta, inzado de bambús e rododendros-, Tsaram (3800 m) e Ramge (4580 m). Había Lúa nova. Nesta época, os hinduístas -que son maioría nos pobos baixos- celebran o Shivaratri, pero non cumplen tan severamente cos seus ritos coma os habitantes das montañas, fieis á doctrina budista.

     Os carrexadores non quixeron continuar. Pedíronnos 2500 rupias por día; ata entón cobrárannos 250 diarias. Ameazaban con non seguir ata o campo base se non aceptabamos a súa solicitude. O presuposto esgotábase. Convencímolos de que seguisen ata Oktang, onde -créndonos perto do base- montamos o campamento. O bo tempo consumíase e comezaba a nevar.