En liña de puntos a ruta de aproximación seguida para chegar ó campo base do Manaslu.
Baixando a Samagaón cos carrexadores, despois de decidir que non continuabamos a ascensión.

Aproximación

     Pasado o Nadal regresamos ó Nepal. Cada nova rexión que visitamos pareceunos diferente, aínda que as condicións de vida das súas xentes son similares. Advertimos, desta volta, as súas múltiples carencias: non teñen a penas acceso á educación nin atención sanitaria, a non ser que viaxen durante varios días a algunha das grandes cidades, e cada familia posúe unha única estancia, na que cociñan, dormen e pasan os seus días.

     Para ascender ó Manaslu compartimos permiso cunha expedición basca: a dos irmáns Iñurriategui. Viñeron tamén con nós Lakpa, o cociñeiro, e Yelu, shirdar e carrexador sherpa que xa nos acompañara en Langtang.

     Pasamos Arughat Bazar, Machha Khola, Ekle Batti -un tramo da aproximación que non está preparado para o turismo- e Namrung, onde atopamos as primeiras neves, despois de que o bo tempo estivese todos eses días da nosa parte.