Diario dun desafío

	O monte Everest, punto máis alto da cordilleira do Himalaia, visto desde o val da cidade de Katmandú (Nepal).

	Vello nepalí, coa arma típica dos guerreiros gurkas (o kukuri) enfundada e suxeita á súa faixa.
	Un neno xoga nun dos moitos postos ambulantes que se poden ver en Katmandú.

Chegada a Katmandú

     O día 27 de agosto de 1997 chegamos a Katmandú, a capital do reino do Nepal. Situada a 1331 metros de altitude, é a cidade máis grande do val do mesmo nome, unha área poboada que se ergue no centro da cara sur do Himalaia "semellante á pegada dun xigante", como conta Masayuki Nakamura na súa obra Nepal Himalaya Trekking.

     O Himalaia é un acio de montañas nevadas que ocupa unha extensión de 800 quilómetros de leste a oeste e Katmandú é o centro económico, político, industrial, cultural e turístico desa zona. A capital é tamén o punto de partida das expedicións ós cumios da cordilleira.

     Katmandú (675.000 hab.) é unha cidade buliciosa, colorida e cun xeito de medievo oriental. Antes de comezar o noso desafío, e mentres solicitabamos os permisos, aproveitamos para pasar un par de días nela. Disfrutamos dos bazares de Asan Tole -a rúa principal do casco vello- e da arquitectura dos seus innumerables templos e palacios. Pero conmovéronnos especialmente as vistas da cidade e do Himalaia que se divisan desde a torre do reloxio do vello Palacio Real e desde os outeiros situados nos suburbios. E, sobre todo, a bóveda dourada do templo budista tibetano de Boudhanath, a máis grande do mundo, con 27 metros de diámetro.