O radioenlace de vídeo/audio desenvolvido en Galicia por INTELSIS para os escaladores da expedición "Desafío 8000" é un equipo de altas prestacións deseñado co obxectivo de cumprir os tres condicionantes necesarios para este tipo de proxectos: a) ampla marxe de temperatura de funcionamento: entre 40° baixo cero e 50° C; b) peso mínimo: menos de 1 Kg. todo o equipamento transmisor; e c) máxima autonomía de operatividade.

	A cobertura do satélite Inmarsat permitiu ofrecer imaxes en directo a distintas televisións de todo o mundo.			Antena emisora no campo III (7300 m) do Kangchenjunga.

     O enlace establécese en frecuencias de Banda L (1500 MHz) con modulación de frecuencia para emitir vídeo de alta calidade cun alcance de 10 Km. As antenas transmisora e receptora son iguais (de reducido peso e tamaño, menos de 50 cm.) e de tipo logarítmico (apertura de 20°), o que permite o seu doado apuntamento manual sen que se requira unha grande precisión.

     O transmisor é un pequeno equipo completamente estanco, o que permite traballar á intemperie. Acepta unha potencia de saída de RF de 200 mW. O consumo é mínimo, de só 2,4 W e cunha tensión de 12 V proporcionada por unhas baterías de Cloruro de Tionilo de Litio de alta densidade enerxética e de alto rendemento a baixas temperaturas. Iso permítelle unha autonomía de 30 horas de funcionamento nunha banda de -40° a 50° C.

     O receptor é tamén de consumo reducido (3,6 W). Aliméntase a 12 V cun xogo interno de baterías recargables de Niquel-Cadmio ou con alimentador externo na súa marxe de temperatura de uso: -10° a 50°C. O conxunto completo, incluíndo os cables e a antena, ten un peso inferior a 1 Kg.